QMUda «Jawızlıqqa qarsı – aǵartıwshılıq» atamasında úgit-násiyat ilajı bolıp ótti

28Búgin Berdaq atındaǵı Qaraqalpaq mámleketlik universitetinde «Jawızlıqqa qarsı – aǵartıwshılıq» atamasında úgit-násiyat ilajı bolıp ótti. Onda Nókis qalası Al-Beruniy atındaǵı orta arnawlı islam oqıw ornınıń oqıtıwshısı J.Iskenderov, Din isleri boyınsha komitetiniń Qaraqalpaqstan Respublikası aymaqlıq basqarmasınıń qánigesi B.Ayımbetova, Milliy ideya ruwxıylıq tiykarları hám huqıq tálimi» kafedrası baslıǵı A.Bayrıeva, universitetimizdiń profilaktika inspektorı R.Tasbaeva hám student-jaslar qatnastı. Ilajdı universitetimizdiń jaslar menen islesiw, ruwxıylıq hám aǵartıwshılıq bólimi baslıǵı Q.Beknazarov basqarıp bardı.

Ilajda sózge shıqqanlar búgingi jedel pátler menen rawajlanıp baratırǵan globallasıw dáwirinde keleshegimiz bolǵan jaslardıń tálim-tárbiyasına ayrıqsha itibar qaratıw, olardı ruwxıy jaqtan jetik hám kámil insan etip tárbiyalawda bárshemiz teńdey juwapker ekenligin ayrıqsha atap ótti. Ilaj dawamında tiyisli taraw qánigeleri tárepinen student-jaslarımızdıń tálim – tárbiyasına itibarlı bolıw, ózlerine dindi nıqap etip alǵan hár qıylı diniy aǵımlarǵa qosılıp ketiwleriniń aldın adıwda bársheni itibarlı bolıwǵa shaqırdı. Sonday-aq, hár qıylı jaman illetlerge qosılıp ketken insanlardıń ómiri, náshebentlik, óz janına qas etiw hám huqıqbuzarlıq islegen ayrım insanlardıń ayanıshlı táǵdirleri haqqında keń túrde túsinikler berip, arnawlı videorolikler qoyıp berildi. Iláj barısında student-jaslar tiyisli taraw qánigelerinen ózlerin qızıqtırǵan sorawlarına juwaplar aldı hám ózleriniń pikir usınısların bildirdi.

Haqıyqatında da, keleshek áwladtı kámil insan qılıp tárbiyalawda, ásirese, jámiyettiń tiykarǵı jetekshi kúshleri esaplanǵan jaslardı joqarı intellektwal qábiletli, dúnyada hám mámleketimizde júz berip atırǵan siyasiy-ekonomikalıq ózgerislerge sanalı qatnas jasay alatuǵın mánawiy dúnyası bay, jetik qánigeler etip tayarlawdı aldımızǵa maqset etip qoyar ekenbiz, usı maqsetti ámelge asırıwda bárshemiz jaslarımızdıń bos waqıtların mazmunlı ótkeriw, olardı hár qıylı diniy ekstremestik, terroristik hám separatisitik idealardan qorǵawımız, kelshegi ullı mámlekette, kelshegi ullı jaslardı tárbiyalawımız shárt.

QMU baspasóz xızmeti